16 سر لعمل بروفايل قوي على Linkedin 💙

بالنسبة لي من اهم المواقع اليومية بقضي عليه وقت اكتر من فيسبوك المشكلة ان في ناس كتير بتخلط بين فيسبوك ولينكيدان مع ان كل واحد فيهم له طبيعة مختلفة تماما ماينفعش البوست الهزار او الكوميكس اللي بتحطه على فيسبوك تلاقيه على لينكيدان

لازم تهتم بالطريقة اللي بتظهر بيها من اول الصورة للبروفايل للمحتوى لأنك بتقدم نفسك لعالم الاعمال

فخلوني اقول بعض النصايح اللي تساعدك على عمل بروفايل قوي ومناسب للينكيدان وازاي ابقى متشاف بشكل كويس من الناس اللي انا عايز اوصلها.

1- اكتب اسمك الحقيقى (مش اسامى دلع)

2- صورة بروفيشنال مناسبة ( مش صورة البحر والبار وصور الشلة او صورة منظر طبيعي )

3- الهيدلاين اكتب عنوان يشد اللي بيدور عليك انه يقف عند بروفايلك بيقول ليه يختارك انت مش حد تاني

4- ال Summary من الحاجات المهمة جدا اللي بتلخص في كام سطر انت مين وممكن تفيد الشركات في ايه

5- استخدم الكلمات اللي الناس ممكن تدور عليك بيها في الهيدلاين والوصف بتاعك

6- اكتب المشروعات اللي اشتغلت عليها ويا سلام لو قولت انت حققت ايه فيها

7- استخدم المالتي ميديا (الصور والفيديو) في البروفايل بتاعك

8- اكتب خبراتك السابقة بعناية وقول حققت فيها ايه ان امكن او لو في قصص نجاح حققتها

9- انشيء لينك مخصص يبقى فيه اسمك..

10- التوصيات مهمة بس من الناس اللي اشتغلت معاها فعلا مش اي ماتعرفوش تبعتله

11- ضيف الناس اللي ممكن يبقى في بينكم اهتمامات عمليه مشتركة او في دايرة شغلك او اللي ممكن تتعاونوا في يوم من الايام مع بعض ، ال مدراء الموارد البشرية والناس اللي في نفس مجالك

12- خلي دايما ليك تواجد من خلال التفاعل مع الناس ، الجروبات

13- انشر بوستات / اكتب او شير مقالات بس تبقى بروفيشنال بشكل دائم ومنتظم يومي او على الاقل 3 مرات في الاسبوع مثلا

14- تابع دايما حجم التفاعل واعرف اهم الاوقات اللي تنشر فيها وتوصل بيها لناس اكتر

15- بوستات اللي بيكون فيها صور وفيديو بيكون نسبة وصولها عالي جدا اكتر من اللينكات الخارجية

16- استخدم الهاشتاج المناسب للبوست

كلمة اخيرة :

لينكيدان مش موقع تواصل اجتماعي وخلاص بتضيع فيه وقت انت بتبني شبكة علاقات هتفيدك في شغلك بشكل كبير ان ماكانش عروض هتجيلك لوظايف او اوجه تعاون بين شركات او افراد ممكن على الاقل تستفاد بمعلومة تفيدك في شغلك او تفيد بيها غيرك