وهل ممكن نستبدل اللحوم البلدي بنوع تاني ؟

ولو فكرنا مع بعض مش هنلاقي بديل للحوم البلدي جيد متوفر في السوق إلا اللحوم السوداني المبردة واللي بدأت تنتشر في منافذ كتير في كل المحافظات

وطبعًا هنسأل نفسنا هل اللحوم السوداني زي البلدي أو حتى قريبة منها في القيمة الغذائية أو الجودة ؟؟

 

هشرح هنا ببساطة كل المعلومات اللي ممكن تحتاجها

اللحوم السودانية مبتختلفش في قيمتها الغذائية عن اللحوم البلدية نفس نسبة البروتين وكمان نسب قريبة في الدهون

الفرق بس انها مبتوصلكش طازة

ف الطعم مختلف شوية عن البلدي

وكمان لأنه بيتغذى ع المراعي الطبيعية وبيتحرك اكتر في المساحات الكبيرة اللي بيتربى فيها وعلشان كده طبيعة عضلاته هتختلف عن البلدي اللي بيبقى محبوس في المعلف أو المزرعة فحركته محدودة جداً وكمان بيتغذى على أعلاف مركبة ومصنعة

 

طيب ومن الناحية الطبية

هقولك

العجول السوداني المفروض إنها جيدة صحياً لأنها بتتغذى على المراعي الطبيعية وكمان المجازر والإشراف الطبي جيدين جدآ في السودان لأن الثروة الحيوانية هناك بتمثل نسبة كبيرة من الاقتصاد السوداني ده غير إن السودان بتصدر لدول عربية زي السعودية والإمارات و دول اوروبية كمان .

 

لكن وعلشان نتكلم بصراحة وزي ما اتعودنا مع بعض

أسعار اللحوم السوداني في مصر بصراحة بقت أوڤر قوي عن ما تستحقه بالعكس ده قربت من سعر البلدي وده بيمثل عبئ على رب الأسرة وخاصة في شهر رمضان الكريم واللي بنهتم فيه بالسفرة والأكل

وعلشان كده بقترح على حضراتكم الاعتماد برضو على اللحوم المجمدة على الأقل في المفروم( يعني أجيبها وافرمها ما اشتريش مفروم جاهز بأي حال من الاحوال)

ايوه اللحوم المجمدة في المفروم هتكون نتايجها ممتازة ومش هتحسو بفرق كبير بينها وبين البلدي 

 

هتسألوني

هل اللحوم المجمدة مدبوحة حسب الشريعة ؟

هقولكم من شروط الدولة المصرية لاستيراد اللحوم هو الدبح الحلال

هل قيمتها الغذائية نفس البلدي والطعم ؟

هقولك بتتأثر بفترات التجميد والنقل وعوامل التخزين كمان إنها لحوم غالبًا بتكون كبيرة في السن

وعلشان كده طعمها وقيمتها الغذائية اقل من البلدي .

 

يعني استهلاكها آمن ؟

طبعًا آمن جدًا وتم اجراء الكشف الطبي عليها قبل واثناء وبعد الذبح .

كل سنة وانتو طيبين ويارب أيام خير على مصر إن شاء الله

وطبعًا النهاردة الجمعة ومننساش دعوة يوم الجمعة ( ولك بالمثل ان شاء الله)