مراجعة جهاز PLAYSTATION 5 | مميزات وعيوب بلاسيتسشن 5 | تجربتى الشخصية ل PS5

أنا كنت من المحظوظين القلائل اللي عرفوا يشتروا PS5 من على أمازون بسعره الأصلي وخدته تجربة متواصلة ٦ ساعات امبارح وحبيت أكتب ملاحظاتي:

اولا تصميم جهاز بلاي ستيشن 5

 

الجهاز فعلا ضخم وتقيل وشكله من بعيد حلو بس لما بتحطه أفقي horizontal بيبقى شكله مش متناسق (مبعجر )عامل زي التماثيل الفنية اللي بنشوفها في معارض الفن اللي ملهاش شكل محدد من وش من قفا والأفضل ليه كشكل انك تحطه رأسي vertical لو مش هيغطي على الشاشة عندك ، شوف الصورة فوق 👆

الجهاز بعد شغل ٦ ساعات متواصلة ملوش صوت مش زي صوت المراوح النفاثة اللي كانت بتطلع من ال PS4 pro ومش هتسمع غير ما تلزق ودنك حرفيا في الجهاز وتعمل mute للتلفزيون غير صوت زنة خفيفة ... وبالنسبة للسخونية أنا حطيت إيدي على الجهاز بعد شغل ٦ ساعات متواصلة لقيت فيه أجزاء منه دافية بشكل خفيف وأجزاء باردة بس لا يقارن بأي شكل بال ps4 pro اللي تلاقيه سخن بعد كام ساعة لعب ولو حطيت ايدك عليه بيلسعك لسعة خفيفة من كتر الحرارة

*ال user interface لسه مش فاهمها ١٠٠% بس اللي جذب انتباهي ان كل لعبة طالع منها كروت وفيه كروت خاصة بمهمات معينة لما بتدوس عليها اللعبة بتنقلك للمكان اللي فيه المهمة ديه

* نيجي بقى للكلام المهم ، ال Dualsense واللي كانت السبب الرئيسي الحاسم إني أغير وجهتي من السيريس اكس لps5 ، الدراع يا جماعة وهمي بكل ما في الكلمة من معنى :

-أنا طوال حياتي مشفتش دراع فيها دقة في ال responsiveness زي ال Dualsense ومش هتحس بالكلام ده غير ما تجربه بنفسك

-ال R2 و L2 بيدوا مقاومة للضغط بحسب الموقف اللي فيه ، يعني استخدام مثلا القوس bow بتلاقي ال R2 بيديك مقاومة قوية تحسسك انك بتشد في حبل مشدود حقيقي ، ال R2 في الأسلحة بينزل مع ضغطتك بمقاومة معينة حسب السلاح وبيرد بسرعة لفوق وينزل تاني كل ده بيحسسك انك بتضغط على زناد سلاح حقيقي

-برضه ال R2 حساس لدرجة ان فيه بعض المواقف بتحتاج تدوس عليه نص ضغطة أو ضغطة خفيف بحيث مينزلش بشكل كامل تحت ، زي مثلا الشخصية اللي بلعب بيها متعلقة بحافة Ledge متآكلة ولو اتعلقت بكل قوتك هتنهار وتقع تموت وبالتالي اللعبة بتجبرك على ميكانيكية النص ضغطة عشان متقعش

-الدراع بينقلك إحساس اللي بيحصل بالظبط في اللعبة ، الشخصية لو بتمشي على زجاج غير ما بتمشي في مية غير ما بتمشي على رمل غير ما بتمشي تلج ، كل مكان بيطلع صوت خطوات مختلفة من الدراع مع vibration مختلفة بتخليك منبهر

-الجديد بقى ان فتحة المايك في أسفل الدراع عاملة implementation لخاصية جديدة تستخدمها في الجيمبلي ... وهي النفخ !! في مرحلة معينة الشخصية راكبة على platform عليه مروحة ريش وعايز ينتقل من مكان لآخر وعشان تنقله لازم هتنفخ في فتحة المايك عشان الهوا يحرك المروحة والشخصية تطير !!

الكلام ده كله أنا مش متخيل سوني هتطبقه ازاي مع حصرياتها لما تلاقي مثلا الفاس في ايد Kratos في GOW بيدي احساس وصوت مختلف تماما عن سلاح blades of chaos مثلا !! التجربة هتبقى مميزة ومختلفة جدا مع ال Dualsense

(Wael Magdy)