"ليه السعر إنبوكس؟ متخافش مش هنقولك إنبوكس
"ليه السعر إنبوكس؟
متخافش مش هنقولك إنبوكس، لأن دي مش غتاتة مننا عشان نكدرك ونقولك على أي معلومة إنت عايزها .. إنبوكس!
بس عايزك تسرح معايا ليه الماركتيرز بيبلغوا تيم المودريشن انهم يركزوا دايمًا ع إن السعر بالتحديد يكون إنبوكس!
تخيل لو إنت فتحت محل بيبيع مكملات غذائية للجيم وكل مكمل غذائي أكيد مش هيقل سعره عن 300ج مثلًا.
ورحت علقت ع فاترينة المحل من برا يافتة كبيرة فيها أسعار كل المكملات الغذائية.. ياترى إيه السيناريو اللي ممكن يحصل!
تعالى لما نقولك:
1- الناس هتقف تتلم قدام المحل عشان تقرا الأسعار ونقصد بقي بالناس هنا كل الناس كل اللي معدي سواء مشترك في جيم - مش مشترك - طفل - قطة واقفة تتفرج ع الزحمة و عم محمد بتاع الفطير المشلتت.
2- هتلاقي فيه زوبعة كده حوالين إن إيه الأسعار الغالية دي! يخربيت الجشع وغالبًا هتلاقي موجة الزعيق والإعتراضات دي جاية من الناس اللي أصلًا مش مهتمة بالجيم ولا عندها دراية بإن طبيعة المنتج ده لازم يكون غالي لإنه بيعمل كذا وكذا وبيساعد في كذا والناس المهتمة اللي فاهمين مستوعبين ده.
3- بعد ما الناس هتعترض هتلاقيها بتأثر بنسبة كبيرة جدًا على قرارات شراء الناس اللي مهتمة واللي كانت من 10 دقايق مقتنعة بس لما عم محمد قال
"ي عيال متضيعوش فلوسكم ع الكلام الفارغ ده، ده أنا أعملكم 10 فطاير بـ 1/4 التمن"
خدوا خطوتين تلاتة لورا.
4- لو إنت عندك مهمة إنك تحول الناس المهتمة دي لناس عندها رغبة تعرف معلومات أكتر عن المكمل الغذائي وده مش هيعرفوه إلا لما يدخلوا المحل برجليهم يشوفوا بعنيهم فـ حلمك الوردي ده طار لما اختصرت عليهم الطريق و حطتلهم الأسعار برا.
5- لو عندك Sales Team فـ إنت بصريح العبارة بتحرقه، لأنه ي عيني هيقف يقنع الـعشروميت واحد اللي واقف قدام المحل بما فيهم عم محمد بتاع الفطير والقطة عشان يقولهم اشتروا المكملات..
مع إنك كان ممكن تساعدوا في إنك تفلتر العشرومية دول لعدد أقل بس إحتمالية شراءه كانت هتبقى أكبر!
فـ الحمدلله إن السعر إنبوكس.
فلما بنقولك السعر إنبوكس مش فضا مننا نرد عليك بمعلومات زيادة ولا موضة ماشيين وراها بس ده بيرجع لأسباب ماركتيرية وبيزنيسية بحتة بتخلي الـ Conversion Rate يعلى شويتين تلاتة 4 5 كده،
فـ لما حد يكلمك ويقولك إن الناس دي غتتة اوي كل حاجة السعر إنبوكس ابقى دافع عننا وقوله الكلام ده:
- السعر إنبوكس.. عشان اللي داخل يروش وخلاص في الكومنتات بمسدج بتقول هو ليه السعر إنبوكس هو سر!
اعرف إنه استحالة هيشتري واللي مهتم فعلًا لا هيهمه السعر جوا الإنبوكس ولا فوق السحاب.
- السعر إنبوكس .. عشان نسبة التحويل أو الـ Conversion Rate يزيد لأن غالبًا يـ إما بيبقى هدف البراند ياخدك ع المسدجات عشان ياخد رقم تليفونك أو يقعد معاك فترة أطول عشان يقنعك بالمنتج اللي إنت في الأول مهتم بيه، يا إما عايز يدخلك ع الويبسايت - بس ناقصلك زقة وتشتري ودي مبتجيش لما بنكتبلك السعر في البوست أو في كومنت بس حتمًا بتيجي لما بنقنعك بمميزاته.
- السعر إنبوكس .. عشان نعلى Reach البوست فـ بالتالي هيفضل فوق وبيظهر لعدد أكبر أصل لو كتبنا السعر في البوست ولا مع أول كومنت سأل ع السعر إنت هتعرف من الكومنت المعلومة وخلاص مش هتكتب كومنت تاني وكده البوست هيموت،
إنما لما يبقي فيه سياسة شوق ولا تدوق وتدخل تشوف المنظر المفرح بتاع الـ 300 كومنت اللي فيهم H.M و بكام وكل الردود عليها إنبوكس ي فندم - لو إنت مهتم هيثير فضولك إنك إنت كمان تكتب كومنت عشان احنا نرد ونقولك إنبوكس ي فندم ومبروك عليك المنتج ي فندم..
فـ هي منظومة كبيرة -إنت البطل فيها عشان إنت صاحب القرار واحنا الإيد الخفية اللي بتساعدك فـ إنك تاخد القرار ده حالًا -بتبدأ بكلمة إنت بتشوفها مزعجة وتافهة "إنبوكس" بس احنا بنشوفها من أنجح التكنيكات التسويقية..
أي حد يقاوح مع أي براند ويقوله ليه السعر إنبوكس ابقوا اديله البوست ده وهو مش هيتكلم تاني.
